Pathian kaihhruaina in kan Kohhran chuan Ni 18 Oct, 2011 atang hian Gospel Camping a buatsaih dawn ta. Speaker atan Rev. Remlalfaka a ni ang a. A hmun hi Bawngkawn Presbyterian Biak In a ni ang. Camping hi chhawnghnih neih tum a ni. Chhawngkhatna hi Ni 19-21 Oct, 2011 a ni ang a, Ni 25-28 Oct, 2011 ah hian chhawnghnihna neih leh tur a ni. Naupang pual Camping pawh tumhnih neih tum a ni a. Naupang pual camping thawhkhatna hi Ni 22 Oct, 2011 Inrinni nileng hian neih a ni dawn a ni. Kohhran Camping ah hian Mi tin ten mahni hna tul kalsanin luh theuh i tum ang u, Pathian malsawmna dawng turin inbuatsaihin, rilru i siam ang u. Pathiana tuihal, rawngbawltute leh mi tinte kan in sawm e. Programme kimchang leh chanvo hrang hrang chelh tu tur te chu Thalai Hruaitu 16th Oct 2011 Issue, Phek-2 naah tarlan a ni a. Hemi link http://bawngkawnktp.blogspot.com/p/thalai-hruaitu-2011.html ah hian en theih in a awm bawk e. Camping-a lut thei lote pawhin kan Kohhrana Pathian hnathawh " Harhna" a lo thlen theih nan kan awmhmun theuhvah Tawngtaiin tan i la ang u.
read more
16 October, 2011
11 September, 2011
NPSS Inkhawmpui neih a ni
Vawiin Dt 11 Sep, 2011 (Pathianni) hian Bawngkawn Pastor Bial Naupang Sunday School Inkhawmpui neih a ni. Department hrang hrangte Kohhran hrang hrangah neih a ni a. Beginner Dept. ten Bawngkawn Chhim Vengah an nei a. Primary Department ten Bawngkawn East-ah. Junior Department te Bawngkawn Hmar Veng ah leh Inte. leh Sacramen Depar-tment te kan Kohhran-ah te neih a ni.
Department tinah hian intihsiakna bakah Special Item pathum theuh neih a ni a. Beginner leh Primary Department ten chawhma chauh hun an hmang a. Junior leh Inter & Sacrament Department ten chawhnu lamah hun an hmang tel bawk. Kan Kohhran Sunday School Department te result hetiang hi a ni:-
Beginner Department : Pathumna
Primary Department : Pathumna
Junior Department : Pahnihna
Inter & Sac. Department : Pahnihna
He inkhawmpuiah hian naupangte mai bakah Zirtirtute inpekna a ropui hle. A bik takin kan veng phei chu Department tinah naupang 150 chuang an awm vek a. hetiang zat naupang kaihhruai hi awl ai lo tak a ni ang tih a rin theih. Zirtirtute hetiang result nei thei tura an thawhrimna a fakawm hle. Pathianni leh khian Senior Department te Bawngkawn Chhim Veng Kohhranah Meet an hmang ve leh ang.
Picture : Beginner Inkhawmpui, Bawngkawn Chhim Veng
09 September, 2011
Tiam tlat e...
Vawiin Dt 9 Sep, 2011 (Friday)Dar 1:00 p.m khan kan rawngbawlpui, Tv. K. Malsawmzuala (Secretary, Johana Group) leh Nl. K. Vanlalhmangaihzuali ( Comt. Member, Marka Group) te chuan kan Kohhran Biak In-ah Kohhran dan thianghlimin kumtluang atan ' Tiam tlat e' an ti ve ta. Ms-a te hi Rev. Remlalfaka'n a inkutsuih tir a. Biak In-a inneih inkhawm zawhah Kohhran Hmeichhe Centenary Hall-ah Joint Reception neih a ni. Joint Reception hi Pu Zoramtana Ralte (Asst. Secretary )in a kaihruai a. Tunhnai lawk a Pu ni ve Pu. K. Lalrotlinga (Branch Leader)in thuchah a sawi a ni. Vawiina kan rawngbawlpui ten Pathian leh Kohhran hriatpuina ngeia chhungkaw bul an han tan hi keini a rawngbawlpuite chuan kan chhuangin kan ngaihlu a. Fanau maltluan chawi a, an thutiam te vawng reng a, kumkhuaa lengdun turin kan duhsakna sang ber kan hlan a ni
04 September, 2011
NPSS Inkhawmpui Rehearsal Neih a ni
Vawiin Dt 04.09.2010 Pathianni Chawhnu Inkhawm khan Naupang Sunday School Department hrang hrang ( Beginner-Sacramen) te inkhawmpui rehearsal neih a ni. Item chi hrang hrang:- Hla, chang leh thu inchhang hmangtein Department hrang hrang te hian in elna an nei a. Tin Junior Dept. leh Inter & Sacramen Department ten lengkhawm hla intihsiaknan hian an hmang bawk. Naupang Inkhawmpui hi Pathianni lo awm tur Dt 11 Sept. 2011 khian hetiang hian neih tur a ni:-
Beginner Department : Bawngkawn Chhim Veng
Primary Department : Bawngkawn East
Junior Department : Bawngkawn Hmar Veng
Inter & Sacramen Department : Bawngkawn
Kar kalta chhung khan tlai tin Naupang leh zirtirtute inkhawmpuina tur thi zir hian an buai hle a. Zirtirtu te inpekna a ropui hle. Karleh hian zir leh tur a ni. Department tin te pakhatna nih tumin an tang hle.
02 September, 2011
Beihrual Programme chhunzawm a ni
Dt 02.09.2011 zan hian Bawngkawn Kohhran chuan Rev. K. Lalrinkima, Principal, Missionary Training College ruaiin Beihrual programme hman chhunzawm a ni. Thuchah ngaihnawm tak, Lal Isua khawvel hrehawm pawh pawisa lova min chhandam tura a lokal ang hian keini ringtute pawh mahni hrehawm pawisa lova chhandamna thu hril tur kan nih thu kan ngaithla.
Missionary training lai pahnih Tv. F. Lalpiantluanga, IIyr B. Mis. leh Nl. Malsawmtluangi IYr B. Mis. te hnen atangin Testimony ngaihnawm tak ngaihthlak a ni bawk.
Naktuk Dt 03.09.2011 (Inrinni)hian kohhran chuan Missionary training hote chawhlui a buatsaih sak ang a. Zan inkhawmah Rev. Sairengpuia, Lecturer. Missionary Training College hnen atangin Pathian thuchah ngaihthlak a ni ang.
01 September, 2011
Beihrual hawn a ni
Kan Kohhranah Beihrual hawnna inkhawm chu zanin Dt 1.09.2010 hian neih a ni. Inkhawm hi Upa Dr. K.C Vannghakan a kaihruai a, Beihrual hawnna a nei nghal. Upa C. Lalbiakthanga hnen atangin Ramthar rawngbawlna lam hawi sermon ngaihthlak a ni. Missionary ten khawlum leh 'vawt pawh pawisa lova thahnemngai taka rawng an bawl thin thu te leh Synod in Ramthar lama rawng a bawl dante ngaihthlak a ni bawk. Kohhran zaipawlte leh Pavalai zaipawlte an zai bawk.
Kumin hian Kohhran hoten hlawk taka he hun hi kan hman theih nan Kohhran Committee chuan ruahmanna a siam a. Dt 12.09.2010 Thawhtan zan inkhawm hi Thalaite programme siamah inkhawm neih a ni ang a. Thawhleh zanah Kohhran Hmeichhia leh Ningani zanah Pavalai te programme hman a ni ang. Heng programme ah hian programme siamtuten kaihhruaina hun pawh an chang ang. Heng bakah hian Pathian chawimawina inkhawm bik pawh siam a ni. Crusade-a hun hman tur a ni bawk a, Speker atan Pastor P.C Pachhunga (Bialtu Pastor) a ni ang. Heng Programme ah te hian Kohhran Committee te chuan beiseina a nei sang hle. Programme hlawhtling taka hman a nih theih nan kan mimal tawngtainaah te i hlan thin ang u.
BEIHRUAL HMAN TAN DAN
- By Laldawnkimi, Archivist,
THUHMA : Kum 1894-ah Chanchintha kan dawng a, kum 1906-ah Harhna tum khatna a lo chhuak a, a tum hnihna pawh kum 1913 ah a lo chhuak leh a, ringtu an pung hle. Mahse hun engemaw chen hnu-ah harhna chu a lo reh a, Kohhran a lo nguiin a lo chak lo leh ta, rinna kawnga an la ngheh tawk loh avangin han ban leh puk puk te a awm a, khawvel miten nuihzatin “Pathian thu awih leh aichhia chuan thal an hua a nia” an ti thin. Mahse, mi engemawzat rinnaa mi nghet leh rinawm an awm a, phurna hloh mahse thahnemngaihna hloh lovin an thawk zel a. He Harhna hnua Kohhran han ngui leh chuan mi tam tak hnungtawlhna leh zuaina a siam mai bakah, thawhlawm pawhin a tuar nghal a, 1917-a Tirhkoh tirh chhuah 7 chu thawhlawmin a daih loh avangin an hlawh bi Rs. 10/- chu Rs. 8/- a tihhniam a ni a. Tichuan ringtute intihchak tawnna leh ringlote beihna chu hnapuia neih an duh ta a ni. ( Mizo Kohhran Chanchin Rev. Saiaithanga phek 54-56, 58)
BEIHRUAL NEIH A NI TA : Hetih lai hian Mizoram Hmar chan pum pui hi Khasi Synod hnuaiah Presbytery pakhat kan ni a, kum khatah vawi hnih ( March & Oct ) Inkhawmpui an nei thin a, March 15 - 18, 1918 Presbytery Inkhawmpui Aijal-a neih chuan hetiangin a rel a
“ Kristian Beihrual-na hi June, 1918 a hian lo awm tan turin kan ruat a. Thla chawhma lam chu mahni Kohhran ho tana in tih chak na tur leh in tih thianghlimna leh in tih ngah lawk na atan kan hmang theuh ang a, tin, thla chawhnu lam chu ringlo te tan a hman tur a ni ang, mi hruai hram turin. Tin, Kohhran tin in an thawh-zia dan theuh tur an ngaihtuah ang”. (Presby. 1918 No.10, Kristian Tlangau May 1918 phek 94 )
Rev. Sandia pawhin hetiang hian hriattirna a chhuah a :-
Hmar-Chan Presbytery thil-tih chhiar ilang-in, thil pawimawh em em an ruat a ni. Tun June thla chhung hian Hmarchan khaw-tin-ah Pathian Ram tizau turin leh Isua mi zawng zawng tithianghlim turin kan beirual ang. Hetiang-in tunlai-in India ram pumpui-ah an ti mek a ni. Malsawmna tam tak an hmu tawh a ni. Tin, unaute u, heng thil hi hriatreng a tul a ni. Kan beihrualna hi ti tha tur leh Pathian hming ti-ropui turin, heng thil hi i ti ang u :-
a) Nashatak-in tawngtai-in Pathian malsawmna kan dil tur a ni, June thla hma pawhin rei fe an.
b) Kan ngaihtuah fo tur a ni.
c) Kan in-en tur a ni. Kan rilru kan buatshaih tur ani. Sualna zep ilangin malsawmna a dal ang. Isua hnena fel takin kan inpe tur a ni
d) Engtinnge beihrualna hi kan tanpui theih ang, kan ngaihtuah tur ani. Tin, a tumna ber kan hrereng tur a ni. Hapta hnih hmasa chhungin, kohhranho mi ti-harh leh ti-thianghlim turin kan beihram ang. Tin, chu mi hnuah chuan awihlote hnena kal-in kan bei-rual ang. Heng thil pahnih hi kan Pathian duhzawng ani tih kan hria. Taima takin i ti ang u. Tin, kan Kohhranho tin in malsawmna ropui tak an hmu ang tih kan beisei. Beihrual thatna tur chu tawngtaiin i dil fo ang u. (Kristian Tlangau May 1918 phek 99)
Hemi tuma an hman dan Lalhnawka khua Lungsum leh Lalzika khua te chuan an report bawk a, a ngaihnawm hle ( Kristian Tlangau Sept 1918 phek 172, 180) Aizawl hmuna an hman dan report Sandia Sap leh Liangkhaia te ziak hetiang a ni. “..... June nikhat zan atang khan inkhawm kan lo tan ta a, Pathian in mal min shawm shak a, keini Kohhran a mawi lovin kan inkhawm chu kan lo hlim ta hle mai a, zan khat zan a pang chuan inkhawm kham lovin kan lo tin ta hial mai a; chumi Kohhran chhunga inkhawm chhung chuan, mi in ah emaw, Biakin ah emaw inkhawm mah ila, kan hlim hle fo thin a, uar hauh lova shawi pawhin hlim reng rengin kan tum tla, tih theih a ni e.
Tin, thla chanve a lo ral dawn Pathianni vawi thum zan ah chuan Inpumpekna inkhawm kan nei a Chu mi inpumpekna ah chuan “Inpumpekna lehkha” an ti a, Pathian hnena kan thu tiam zawng zawng kan lo thlah thlam tawh shi kha chawk harh leh turin In tiam na lekha te tak te mi zawng zawng hnena an shem a. Tin, mi pakhatin Pathian hnena inpek tharna lam thu a shawi a; han ngaih thlak meuh chuan kan Pathian thu awina hi a lo pan deuh tak a lawm maw ! tiin kan in shit theuh mai a “Tun hma lam ai kha chuan ka va bei nasha deuh tawh dawn em” kan ti rilru theuh a ni. Tin, thu sawi zawh a chuan “In-pum-pek thawh-lawm” an ti a,thawh-lawm kan upa ten an khawn bawk a, chu tah pawh chuan ni dang ai chuan kan thawh tam zawk theuh a ni awm a, chu mi tum maiah chuan cheng 14/- lai kan ngah a. Tin, chu tah chin a chuan Pathian thu awi lo ho kan bei tan ta a. Mi lian deuh in mi lian deuh an bei a, mi te deuh in mi te deuh kan bei a, nula in nula, tlangval in tlangval, pitar in pitar, putar in putar, naupang in naupang, mahni tum tawk theuh kan bei a. Pathian in chakna min pek avangin tumahin hlau lo leh zak lo leh ning lovin kan bei theuh va: ruah sur chung te pawh hian kan bei zel a kan lawm em em vek a ni...........”
Khaw hrang hrang atanga Beihrual vanga hming pe thar mi 344 an ni. (Kristian Tlangau Oct. 1918 phek 194-195)
Hetianga June 1918 ah hlawhtling taka an hman avangin October, 1918-a Champhai Hmunhmeltha khuaa Presbytery chuan “Beihrualna hi awm leh sela kan ti tlang a, kum 1919 September a ni ang, a tih dan tur chu hmana mi ang bawk khan a ni ang”. tiin a rel leh ta a ni ( Presby. Oct. 1918 No.11 )
Ringtuten thahnemngai taka an tawngtaina leh an beihna chu Pathianin mal a sawm a, kum 1919 ah chuan Harhna tum thumna a lo thleng leh ta nghe nghe a nih kha.
HMAN HUN : Kum 1918 ah June , 1919 leh 1920 ah September, 1921 ah January ,1922 - 1924 ah April thlaah te hman thina ni a, mumal taka September thla kan hman hi 1925 atangin a nih hmel e. (Presby. Oct. 1920 No.25, Oct. 1921 No.33, Assembly 1925 Jan No. 18)
THU ZIR : Standing Com. rel angin kum 1937 atangin ram pum huap thu zir bik siam tan niin a lang, “ Kan Kohhran kum tin Beihrual hi fel zawka kan tih theih nan Beihrual programme ram pum tan siam ila, kan subject chu Insumna thu lam nise” (SC dt.28.6.1937 No.7). Mizoram buai avangin ram pum huap zir tur siam loh tum a awm a, hengah hian mahni Kohhran remchan anga buatsaih leh hman a ni. Hapta hmasa ber Ramthar hapta hi 1981 atanga hman tan a ni a, Hapta lina Kristian Chhungkaw hapta hi 1983 atanga hman tan a ni.
BEIHRUAL THLA HMAN DAN TIHDANGLAM RAWTNA:
Aizawl West Presbytery-in Beihrual thla hman dan tihdanglam a rawtna chu 2001 Synod chuan tha tiin SEC bawhzui turin a dah a ( 2001 Synod Gen.5) Questionaire-te siama ngaihdan hrang hrangte lakkhawm anih hnuah tihdanglam dan tur hetiang hian rel a ni :
1) Beihrual hi September thlaah hmang zel ila.
2) Tualchhung Kohhranin remchang leh tha atih angin Biak in leh in lamah hman pawlh thin a ni ang.
3) Thupui hi rampum huapin Synod-in ala siam zel ang a, amaherawhchu a thupui leh Bible chang tarlan bakah a kaihhruaina thuziak hi chu tuna kan hman lai aia tawi fel zawka siam tur a ni ang.
4) Mahni Kohhran tan tangkai leh sawt zawka hmang duhte tan zau zawka zalenna pek a ni ang.
5) Kan Kohhran hmalakna pawimawh - Kristian Chhungkua, Ramthar leh vantlang nun siamthatna ( Social concern) lam thilte hi hlamchhiah loh tur a ni ang.
(Source: Mizoramsynod.org)
Johana Group Nite tluang taka hman a ni
Dt 29 August, 2011 Thawhtan zan khan kumin chhunga a hnuhnung ber atan Johana Group ten Group Nite an hmang. Group Nite hi Kohhran Hall-ah hman a ni a. Member inkhawm pawh kan thahnem hle. Hall khat tlatin kan inkhawm a, kumin-ah chuan kan tam ber tum a ni hial awm e.
Johan Group te hi inbuatsaihna hun an nei tlem hle mai a. Bial Meet leh Literature Nite te a karah a tlak avangin an duh ang pawhin an inbuatsaih tha thei lo va. Amaherawhchu, hun tlem te an nei chung pawhin Item neituten an theihtawp chhuahin an inbuatsaih a. Pathian hruaina zarah tha takin Group Nite hi an hmang thei a ni.
Group Nite-ah hian Item chi hrang hrang-Live Band, Worship Dance, Skid, Synchronise Swimming te thlira, ngaihthlak a ni a. Member naupang zawk leh zei tak tak ten heng Item te hi an rawn entir a. Inkhawmhoten kan hlawkpuiin mit leh beng a tlai hle.
Kumin (2011) ah Group ten Group Nite kan hlut hlawm hle a. A lawmawm hle mai. Kan kalzelna turah thil tha ber rilrua ngaihtuah ranin kan rawngbawlna i kalpui zel ang u. "Thil tha tia tana siam" kan ni si a.
22 August, 2011
Bawngkawn Pastor Bial KTP Meet 2011 tluang taka hman zawh a ni ta
Bawngkawn Pastor Bial KTP Meet 2011, Dt 20 Aug, 2011 (Inrinni Zan) atanga Nepali Branch Church-a hman chu Dt 21 Aug, 2011 (Pathianni) zan khan a tiak ta. He Meet-ah hian Speaker atan Rev. Vanlalbela, Bawngkawn chu hman a ni a. Speaker hnen atang hian Sermon tum thum- Inrinni zan, Pathianni chawhnu leh Pathianni zanah te ngaihthlak a ni. Speaker hi thupui thlansak lovin thalaite tana a veizawng sawi tura beisei a ni a. Bial chhung Member ten Sermon ngaihthlak manhla kan tiin kan hlawkpui hle.
He inkhawmpuiah hian Bial chhung Branch tin ten Zaipawl an nei thei a. Tin Pathianni chawhnu leh Pathianni zan inkhawm ban Fellowship-ah te Branch tin atangin Item hmuhnawm leh beng ti tlai tak ta te ngaihthlaka, en a ni bawk. Item neitute inbuatsaihna a tha a, a hlawhtling hlawm hle.
Inkhawmpui thlengtu Nepali Branch Church-te inbuatsaihna a fakawm hle. Inkhawmpui an thlen vawikhatna a ni a, inkhawmpui an thlen vawikhatna a ni tih hriat miah lovin engkim felfai takin an kalpui thei a. Branch Church leh an KTP te inpekna a ropui hle. Refreshment lamah pawh Palaite min hrai tlai hneh hle. Inkhawm ban apiangin thingpui leh a hmeh tui tak min chhawp thei reng mai a. Kohhran hmeichhe lam pawh an hah hle. Pathian hruainaa Bial Meet 2011 tluang taka hman a ni a lawmawm hle a ni.
20 August, 2011
Literature Night ropui taka hman a ni.
Dt 15 Aug, 2011 Thawhtan zan inkhawmah khan Pathian hruainain Literature Night tluang taka hman a ni. He hunah hian Dr. C. Lalhrekima, Mission Veng in Literature leh Depression inkungkaihna (Depression hi hmanlai miten Literature tih hausak nan an lo hman thin dan) thu Mizo History atanga rawn chhui chhovin thiam takin a sawi a. Member ten an ngaithla kham lo hle.
Heng bakah hian Literature Committee te buatsaih Extempore Speech leh Spelling Bee ropui tak neih a ni a. Short Play hmuhnawm tak leh zirtir nei tha tak an rawn entir bawk.
Hemi zan hian Literature Committee te buatsaih inelna chi hrang hrang- Bible Crossword, Article leh Short Play inziahsiak leh hla inphuahsiak lawmman te sem nghal a ni bawk.Heng Article leh Short Play inziahsiak leh hla inphuahsiaka lawmman latute thuziak leh hla phuah hi a remchan hunah blog ah hian a duh apiang chhiar theih tura dah tum a ni.
14 August, 2011
ZAITHIAM THLAN ZAWH A NI TA
Ni.19. June.2011 atanga tan Zaithiam Thlan-2011,Pathianni Naupang Inkhawm te buatsaiha kan neih chu vawin Ni.14.Aug.2011 hian zawhfel a ni ta. He zaithiam thlanna ah hian mi 87 lai an tel a, heng ahnuaia mite hi Zaithiam kan thlanchhuahte chu an ni.
Pakhatna : R.Vanlalruati D\o Lalhruaitluanga Elizabethi Group
Pahnihna : Lalhriatrengi D\o Ngurthantluanga Elizabethi Group
Pathumna : Lalmalsawma S\o Lalhmachhuana Mikaela Group
Top Ten a tling te :-
K.Lalrinfeli D\o Rodingliana Mikaela Group
Lallawmkima S\o Lalrammawia Mikaela Group
Lalremruata S\o Malsawmzuala (L) Mikaela Group
Vanlalzawmngheti D\o Lalhmingsanga Elizabethi Group
C.Lalhriatpuia S\o C.Tlanghmingthanga Mikaela Group
R.Lawmnasangzuala S\o R.Lalmuansanga Gabriela Group
Lallawmawmi D\o Lalmuankima Elizabethi Group
C. Lalrinmawii D\o C. Lalrinawma Mari Group
Ramngaihzuali Zote D\o Zodinpuia Mari Group
13 August, 2011
PAVALAI RETREAT NEIH A NI
Bawngkawn Kohhran chuan Dt 13,08.2011 (Inrinni)-ah Pavalai Pawlte pualin Retreat a buatsaih a. He Retreat-ah hian Speaker atan Rev. Rev. Remlalfaka hman a ni. Pavalai Pawlten he retreat hi an hlut hle a. Mi 142 laiin he retreat hi an hmang a ni. Pathianni Chawhnu leh zan ah Follow-up Programme hman a ni ang.Kohhran-in kan hlawkpui ngei kan beisei.
09 August, 2011
Pathian hruaina in Matthaia Group Night Hlawhtling taka hman a ni
Dt 27 July, 2011 Thawhtan zan khan Matthaia Group Night chu Pathian hruainain tluang taka hman a ni. Item chi hrang hrang:- Worship dance, Miss Contest leh Video show-Interview ropui leh group video te thlir ho a ni a. Kan hlimpui hle. Group Night inbuatsaihnaa member-te thawhhona leh inpekna a fakawm hle. Hetiang hian kan rawngbawlhona ah hian lungrual takin thawkho zel ang u.
22 June, 2011
Matthaia Group Night Ni 27 June ah
Bawngkawn KTP Matthaia Group te chuan Ni 27 June hian Group Night an hmang dawn a.. A nghahhlelhawm tawh hle mai.. An inpuahchahna a tha in an fakawm hle. Zantin deuhthaw an items chi hrang hrang zirin member te an feh chhuak thin a.. an phur hle a ni. Member thawkchhuak an tha in khawchhe karah pawh an duai lo hle.... Tluang taka programme te an hman theihnan tawngtaina ah i hre theuh ang u.. Tam thei ang ber Inkhawm tum ila, thiante i sawm theuh ang u.
.
read more
.
11 June, 2011
Aizawl Hmar Presbytery KTP Meet Vawi-2 na a Tiak ta
Aizawl Hmar Presbytery KTP Meet June 3-5 chhunga Zemabawk Presbyterian Kohhran BiakIn a neih chu hlawhtling tak hman zawh a ni a. Bial hrang hrang atangin member thahnem tak an kal a. Zaipawl Bial tin atang leh Kohhran tin atangin ngaihnawm tak tak kan ngaihthla a. Thuchah ropui tak tak kan ngaihthla bawk a, memberten hlawkthlak an ti hle a ni. Presbytery Meet hi KTP General Conference neihloh kuma neih thin tura rel niin Kum 2009 ah khan a vawikhatna atan Durtlang Kohhran BiakIn ah neih a lo ni tawh a. Kumin hi a vawi 2-na a ni.
Aizawl Hmar Presbytery huam chhunga Pastor Bial hrang hrang KTP te dinhmun tlangpui chu hetiang hi a ni.
Branch Awm zat : 26 Office Bearers : 30
Committee Members :100
Ex-Officio Member : 19
Member zat : Mipa - 3855, Hmeichhia - 2618
Missionary chawm zat : Bial - 13, Branch- 44
Branch Chanchinbu chhuah thei zat : 16
CKTP Chanchinbu ‘Kristian Thalai’ lak zat : 1295
Thawhtan zan Inkhawm % : 32.844 %
Bawngkawn Bial bik Dinhmun chu hetiang hi a ni :-
Branch Awm zat : 5
Office Bearers : 6
Committee Members : 20
Ex-Officio Member : 5
Member zat : Mipa 1015, Hmcichhia - 734
Missionary chawm zat : Bial - 2, Branch- 15
Branch Chanchinbu chhuah thei zat : 4
CKTP Chanchinbu ‘Kristian Thalai’ lak zat : 449
Thawhtan zan Inkhawm % : 23.71
Marka Group Night hlawhtling taka hman a ni
09 April, 2011
2011 MATRIC EXAM RESULT
Bawngkawn KTP member-te zingah Matric result chhuaka ti tha tak tak an awm a, kan lawmpui hle. Hetih lai hian hlawhtling zo ve ta lote kan tuarpui a, tha taka result tha zawk nei turin duhsakna kan hlan bawk e. Heng a hnuai ami te hi result kan hriat theihte chu an ni a, hmaih palh kan awm anih chuan Ph. no 986373631 emaw 9774955067 ah hian min hriattir ula, kan lawm hle ang.
*VL Ngainatawma s/o Lalthlamuani,Mk- D (L in Sc, Mz)* Lalliankima s/o Laltleipuii,Mt - D (L in Sc)
* C.Lalawmpuii d/o Lalropuia Chhangte Mk - I
* Christina Lalhmingpuii d/o K.Vanlalzawna, Mk- I
*C.Lalmuanzuala s/o C.Vanlalvena (L) Mt - I
*Elshadai Lalhriatpuia s/o H.I.Lalhmingthara, II (L in Mz)
* H.Malsawmdawngzuala s/o H Lalchhanchhuaha Mt. -II
* Ngurnunsanga s/o R.Lalmuana (L), - II (L in Mz)
* Lalduhsangi d/o C. Biaktluanga (L) Mt. - II
* Lalremtluangi d/o C Lalrimawia, Mt- II
* Lalchhanhimi d/o K. Lalropianga, Mk - II
* Lalpekhlua s/o Sarvana, Mk - III
Summer Concert 2011 neih tum a ni.
Branch KTP sum tuak nan ‘Gospel Summer Concert’ April Ni 29 zan khian Bawngkawn Pykka Field-ah buatsaih tum a ni a. He mi hunah hian Gospel Singer Band, fiamthuthiam, zaipawl etc, sawm tum an ni. He Summer Concert neih tur atana Department hrang hrang - Advertisement, Ticket, Transportation, Reception & Ushering leh Information & Publicity te chuan hma chak takin an la tan a, member ten tawngtainaah i hrereng ang u.
read more
02 March, 2011
Ni 28 Feb 2011 KTP Request Programe
Tv BTA-Urhsun taka Pathian faka zai hian rilru chu a khawih thin teh sin!!!
Patea ph theihpa top a a thiam danin a partner thar nen hlim takin an zai e!!
KTP Champions Legue lo om tura Team tur pawh fel a ni ta....
Kan Thusawitu Tv Rotlinga, duhsak takin a ke kal pawh phal lovin David Pachakan a paw thleng zak mai....
Subscribe to:
Posts (Atom)
