27 September, 2010

HARHNA A THLENG

Camping chhawng khatna leh chhawng hnihnaah Pathian hnathawh ropui tak a lo thleng a. Campers tam tak Pathian hnenah an inhlan thar a. Inkhawm boruak pawh a nuam hle. Lamtuala lenglo khawpin naupang, Thalaite an lam mup mup a inkhawm leh Pathian faka zai a nuam hle. Vawiin hian Camping chhawngthumna luhleh tur a ni. Kan Kohhrana Pathian hnathawh a lo thlen zel theih nan i tawngtai zel ang u.
read more

25 September, 2010

CAMPING CHHAWNGHNIHNA CHHUAK

Camping chhawnghnihna Dt 20th-24th September 2010 chhunga neih chu Zirtawpni khan chhuah a ni. Camping chhawnghnihnaah hian Mipa 89 leh Hmeichhia 45 lutin an vaiin mi 134 an lut a. Camping puipate, eirawng baw- ltute leh Tawngtai khawlte nen he Camp a riak lut hi an vaiin mi 200 an ni. He camping hlawhtlinn tura mahni hna tul leh pawimawh kalsana thawkchhuak te chungah lawmthu kan sawi e. Inrinni Dt 25 Sep 2010 nileng hian naupang pualin Biak In ah Camping neih a ni bawk.
read more

24 September, 2010

KOHHRAN CHANCHIN

BAWNGKAWN PRESBYTERIAN KOHHRAN CHANCHIN TLANGPUI
Bawngkawn hi bawng vulhna hmun atana hman a nih avangin a tirah chuan ‘Bawngpukawn’ an ti a, mahse a hnuah ‘pu’ tih chu paihin ‘Bawngkawn’ tih a lo ni ta a, chu chu vawiin ni thlengin a la pu zui ta a ni.
KOHHRAN LO INDIN DAN :
Bawngkawna Mizo awm hmasa berte hi kum 1948-ah an lut a, zawi zawiin Mizo chhungkua an lo pung ve zel a. Mahse, Bawngkawna awm hmasa te hian sakhaw lam thil an lak run loh avangin Kohhran a ding har hle a ni. Hun a lo kal zel a, mi thahnemngaite an lo awm ve ta zel a. Sawi dan hrang hrang te awm bawk mahse Bawngkawna inkhawm an neih tan kum hi kum 1958 ni ta berin a hriat a ni.Pu Vanthanga inah an inkhawm tan a. Dt. 24th March, 1960-ah Preaching Station ah dah a ni a. Hetia Kohhran a lo din hnu hian Kohhran kalphung leh serh leh sang thilah pawh an bangbo hle a ni. Thil tul leh kalphung tur sawikhawm tul chang pawhin kum lama upaho ten ro an rel mai thin a ni. Inkhawmna atan mimal in hman reng kha remchan lohna a awm theih thin avangin inkhawmna tur hmun dang zawn a ngai a. Tichuan Nepali School ( Biak In bula awm thin kha) chu inkhawm nan an dil ta chawt mai a; an lo remti ve mai bawk a. Mahse Puja lai hian harsatna an tawk ziah mai a, hmun dang zawn leh a tul ta a. Tichuan Project School (Brigade chhunga Sikul) chu inkhawm nan an dil leh ta a. Hetih lai hian Project Schoolah hian Pu Thawnga chu Zirtirtu a ni a, a ni chuan a lo remtih sak a, hun engemaw chen chu hetah hian an va inkhawm thin. Mahse, a va fal deuh avangin zan lam inkhawmte an tan a lo harsa a, Pu Vana inah bawk an insuan lut leh ta a ni. Hetih hunlaia bul lo tantute thawhrah vawiina Kohhran hoten kan rochun chu Biak In hmun hi a ni. Project School-a zana va inkhawm fo kha a harsat avang leh mimal ina inkhawm reng pawh thil tha nia a lan tak loh avangin Biak In hmun mamawh hle in an inhre ta a. Tichuan Baje-a nu, Kokila Devi chu Biak In hmun atan a ram sahthlak sak turin an dil ta chawt mai a. Ani’n a lo remti ve mai bawk a. Hetia a ram Kristiante Biak In hmun atana a lo pe mai hi an Gorkhali hotute chuan an kamkhat hial a, mahse Pathian tan a lo pe tawh si a, rinawm takin a keng tlang ta a ni. Hemi a pek bak hi Dt. 24th April, 1965 khan Pi Kokila Devi ram hi Rs 100/- in an lei belh leh a, chu chu tuna kan Biak In hmun hi a ni. Hun rei tawh tak atanga Kohhran hoten neih tel an duh em em Nepali School hmun pawh Kohhran hoten hmundangah a thlengna tur ram leiin inremsiamin an nei thei ta a. Tin, Primary School-I hmun pawh a bul ram leiin Kohhran hoten in an sa a. Hei pawh hi inthleng felin Kohhran ho tan Biak In hmun zau tak leh remchang tak a lo nih phah ta a; Pathian remruatna leh Malsawmna ropui tak a ni.
KOHHRAN INDAN :
Sawi tawh angin Dt. 24th April, 1960 atang khan Preaching Station angin an lo awm chho va. An inkhawm hran atanga kum 6-na Dt. 16th February, 1964-a Committee chuan mahni inrelbawl hrang ve thei tawh a inngaiin Kum 1964-a Presbytery Inkhawmpuiah Kohhran indan dil nise tiin a rel a. Tichuan he thu hi Dt. 5 – 6 March, 1964-a Durtlang Pastor Bial Inkhawmpui, Muthi Kohhrana neihah thlen a ni a. Bial Inkhawmpui chuan Presbytery Inkhawmpuia thlen turin an dil ang hian a pawm a ni. Tichuan, Durtlang Pastor Bial chuan Hmarthlang Presbytery Inkhawmpui Dt. 8 – 11th October, 1964- a Zemabawk Kohhrana neihah a thlen a. Khawmpui chuan Thurel No 7 (3)-naah Bawngkawn Kohhran indan chu a phalsak ta a ni. Tichuan, Presbytery Inkhawmpuiin a phalsak angin Dt. 27th December, 1964 khan Bawngkawn Preaching Station chu Chaltlang Kohhran atangin a lo indang ta a ni. Hetih laia Kohhran dinhmun chu hetiang hi a ni.
1. Kohhrana hming ziak zawng zawng - 147
2.Dan zawhkim - 63
3. Kohhran Secretary - Pu Ch. Thandanga
Preaching Station-a an awm lai atang hian Hruaitu thahnemngai tak tak an nei chho reng a, tichuan, kum 1964-ah Kohhran indang a lo ni ta a. Kum 1965-ah chuan Bial Inkhawmpuiin a phalsak angin Tual Upa panga Dt. 28th March, 1965 Pathianniah an thlang a, heng mite hi Kohhran Committee hmasa ber te an ni:-

1. Pu Sailala 2. Pu Vanthanga 3. Pu Chhunbuaia 4. Pu Thanga
Hun a lokal zel a, Bawngkawn Kohhran pawh Pathian zarah a lo thang ve zel a. Kohhran indan ngai hial khawp in a lo lian ve ta a. Bawngkawn Kohhran atang hian Bawngkawn Chhim Veng Preaching Station chu Dt 6th February 1994 ah hawn a ni a; Bawngkawn Hmar Veng Preaching Station pawh Dt. 4th February, 2001 khan hawn a ni.Kum 1997 Synod Inkhawmpui chuan Bawngkawn Pastor Bial hawn a remti ta a. Dt.11th January, 1998 Pathianni ah Bawngkawn Pastor Bial thar chu hawn a ni ta a. Hemi ni hian Bawngkawn Pastor Bial vawngtu hmasa ber ni turin Rev. Zawlthuama chu Induction Service neih a ni bawk. Hetih hun laia Bawngkawn Pastor Bial hian Bawngkawn Chhim Veng, Zuangtui, Thuampui, Muanna, te a huam a. Hetia Pastor Bial thar a lo nih tak avang hian Bawngkawn chu Bial Station a ni nghal bawk a ni.
BIAK IN SAK THU :
Dt. 12th February, 1962 zana Kohhran Committee-in a rel angin Biak In sak hna chu tan tur a ni ta a. Sum an nei tlem si, Biak In chak tur engmah neih lawk a awm bawk si lo va, thawhlawm khawn leh phawt loh chuan hma a lak theih lo va.Tichuan, Chaltlang Kohhranah sum an dil chawt a, anni’n Rs. 90.68/- an lo pe a, an lawm hle a ni. Biak In chak turte la khawmin Dt. 17th March, 1962 khan a dung 24x16ft, a bang dap leh a chung di-in Bawngkawn Kristian Biak In hmasa ber chu sak tan niin, Dt. 26th May, 1962-ah sak zawh a ni a, Dt 27th May, 1962 (Pathianni) ah an luah zui a ni. Kum 1966-a Mizoram a lo buai tak avangin thingtlang hmun hrang hrang atangin khawpuiah an lo tlan lut a, Bawngkawnah pawh mi thahnem tak an lo pem lut a; Kohhran member pawh an lo pung ve ta zel a. Hetiang a nih tak avangin Biak In hmasa khan a dawl zo ta lo va, Biak In thar sak a lo tul leh ta a. Tichuan Dt. 15th January, 1968-ah Building Committee din nghalin Biak In Pahnihna (33x24ft) a chung rangva leh a bang tile, tha ve thawkhat tak chu sak tan nghal a ni a. Biak In thutthleng lam hi hetih lai hian an la indaih lo hle a, mau pum thum vel remkhawmte hi thutthlengah an siam a, thut a hahdam lo hle awm e.
Kohhranin Pathian Malsawmna nasa tak dawngin memberte an lo pung zel a. Biak In zau zawk leh tha zawk mamawh a ni ta zel a. Dt. 24th April, 1980-a Kohhran Committee chuan Biak In thar sak a lo rel leh ta a. Dt 12th July, 1986 khan hetih laia Bial vawngtu Pastor Thanglianpuia, Chaltlang Pastor-in Biak In Pathumna lungphum a phum a ni. He Biak In thar hi a dung 70ft, avang 42ft. a zau a ni a. Gallery a nei bawk a ni. He Biak In thar hi sak anih atanga kum 12-naah sak zawh a ni. Biak In Pathumna sak zawh chauh a, member kan pun belh zel a, kan Biak Inah chuan kan leng lo a ni zui leh ta mai a. A aia zau leh lian kan mamawh leh ta a ni. Tichuan, Dt 22nd February, 2003 khan Biak In thar tur, a dung 100ft. leh avang 60ft. a lian tur sak hna chu tan a ni leh ta a. Tunah hian he Biak In tur hi la sak mek zel a ni. Bawngkawn Kohhran hi Aizawl Hmar Presbytery-a Kohhran lian ber pathumna leh Mizoram pum huapa Kohhran lian ber parukna a tling hial a ni.Pathianin a Kohhran hote nasa takin mal a sawm a, Kohhran thangduang tak, mite rin phak baka thang chak a lo ni ta a. Pathian hruaina leh Malsawmna liau liau a ni.
KRISTIAN THALAI PAWL DIN THU:
Kristian Thalai Pawl, Bawngkawn Branch hi Dt. 5th November, 1967, Pathianni Sande Sikul banah Bialtu Pro.Pastor Challianngura hovin din a ni. A tirah member sawmnga an awm a, Hruaitu hmasa te chu hetiang hi an ni (a hunlaia an ziah angin):-
Leader : Pu Rochhunga
Asst. Leader : Pu Dawngliana
Secretary : Tv. K. Zokhuma
Asst Secretary : Tv Chawnghmingliana
Treasurer : Nl. Lianchhungi
Kum 43 lai a lo ni ta, tunah hian member 800 lai awmin Missionary pali an chawm mek. Kohhran kut leh ke nih tling takin kawng tinrengah Kohhran innghahna an tling a ni.
KOHHRAN HMEICHHIA :
Kohhran Hmeichhe Committee hi Dt. 18th April, 1965 (Pathianni) khan din a ni a. Hemi ni hian hruaitu tur pawh an thlang nghal a, heng mite hi hruaitu hmasa te an ni:-
1. Pi Tlangpari 2. Pi Sapzingi 3. Pi Chawngbuangi 4. Pi Lali 5. Nl. Lalzawmi
Kohhran Hmeichhiate rawngbawlna avang hian Kristian Chhungkua, Nitin chhung inkhawmah leh Buhfai tham lamah nasa takin hma kan sawn a, a lawmawm hle a ni.

Kan Kohhranho Lungphum chu, A Lal Isua Krista.”
read more

21 September, 2010

CHHANDAMNA CAMPING


Kar hmasa Dt 13-17 Sep, 2010 khan Synod Revival Speaker Lalhruaimawia Team "Kraws Fate Team" ruaiin Bawngkawn Kohhran chuan Beraw tlangah Camping chhawngkhatna neih a ni a, mi 103 vel lutin Pathian hruainain an vai hian siamthar lehna changin an lo chhuak a. Tunkar Dt 20-24 Sep, 2010 hian Camping chhawng hnihna neih chhunzawm leh a ni. He Camp-ah hian Mipa 88 leh Hmeichhia 45 an lut. Camping chhawng hnihna hi Zirtawp Dt 24.09.2010 ah an lo chhuak ang.
read more